Putaton ko' Putatan?

Ngaan do Putatan om Putaton miipiaga. Kivaa naku do pionitan diti? Toombo tiso ii kotunud?

Putatan nopo nga kinoizonon id somok do tahungan Bavang Putatan. Putaton nopo nga iso mantad di kampung ngaavi id Uvang Inobong ii avazaan do Bavang Moyog.

Saazo do Bavang Putatan o Bavang Moyog. Ii om ii bavang dii. Tumimpuun o Bavang Moyog mantad Paod Nuhu do Krokor (Crocker Mountain Range) om humuzung maza do kakampungan do Moyog, Pogunon, Inobong, Tanaki, Nampasan, Penampang Kozo, Dambai, Babah-Bunduon, Mahandoi-Kandazon om gisom no doid Tulangis. Mantad doiho, pungaanan nodii dati ii do Bavang Putatan gisom no doid daat do Meruntum.

Ontok di koikot o tuhun magagampa Bolitis, notimpuunan do mananom do gata di ponounan 1890dan. Novit do Bolitis tuhun Sina do kumalaja id kabun gata. Mantad no dii do kivaa Sina minonoodo do kadai toniini id Putatan. Kazu pinonoodo dii.

Pinungaanan do Bolitis o kinoizonon dii do Putatan sabap do ogumu kazu pungaanan di "putat" poinsuni do doiho ontok timpu dii. Pungaanai no kinoizonon dii to Putat town. Maid-haid, nadadi o Putat town do Putatan. Otopot nopo nga' Putaton daa ii kotunud. Nga huu saazo do bavang o Putaton.

Ingkaa no do nopungaanan Putatan do 'Putatan.'

Dadi, ingkuo ngaan do 'Putaton'? Kivaa nangku do Sina mantad Putatan  nokoizon id kinoizonon dii om pungaanai no dau do Putaton ii? Nakasavo dati o Sina dii do tuhun do Inobong.

Kivaa susuzan do nokoikot o tuhun Sina id Inobong. Iso nopo kinoizonon do kivaa Sina mogiigizon nga id kinoizonon pungaanan do 'Pagansakan' do baino. Nung ingkaa, mositi nopo dati do mantad ngaan Putatan do notoodo o ngaan do 'Putaton.' Au dati kadavot o Sina do mangait do Putatan.




Kopoihaan:
1. Aiso do Bavang Petagas ontok dii. Petagas nopo nga okonko Bavang molulu nga palit haid ii. Kavavagu ii.

2. Maan ih potunudo susuzan diti songian kaanu kopoihaan di hobi kotunud.