Agazo Vaig Hizud nga' Osintukan Vaig

Mantad nombo hizud? Mantad lasam.

Mantad nombo o lasam?

Mantad tavan? Aiso do bavang toi daat do doiho.

Mantad daat om bavang? Daat om bavang id siibo do tavan.

Na, iso no sisimba dii. Mantad Minamangun ii.

Kohizud songian madasam do asapou om ahaid. Osusa nodii o tuhun om moboos, "Umaasam nopo!" ka. Nga songian do au umasam, moboos o tuhun do, "Songian dii ma do umasam?" ka. Songian do modizud, mongomu o tuhun om moboos, "Modizud nopo," ka.

Oukot o pomusaavan. Osusa do monontob kogiiginovoo do tuhun. Kivaa nopo poguangan!

Mimang gazo vaig do bavang om papas songian do umasam. Songian do au kouha ginazo di bavang toi papas, mimang havas ii vaig humabus. Dadi koizud nodii.

Ogumu Vaig nga Osintukan Vaig
Avasi do maasam-asam tu kivaa nopo do vaig gunoon do tuhun. Nung magadau, umasak o bavang, okoing ngaavi o tanom. Nga songian do madaat om humizud, ogumu nogi kaantakan.

Miaga po do daat songian do kohizud. Nga sabap no do azamut o vaig hizud, maan dii tutubo' o paip tagazo om potoodon pom vaig. Songian do aavi vaig ii tabaakas ii poingopi id tangki tagazo, aiso nodii vaig tavasi koikot doid hamin ngaavi do tuhun. Miaga kozo di susuzan kokomoi tuhun di au koinsud o kapal vaig id tanga daat tu' noumbak hazag do kapal dau. Songian di noovian do vaig, minoboos isido, "Vaig nopo doid nombo nopo nga aiso sontitik vaig do inumon," ka.

Ingkaa no songian do oumbak o paip toi tutubon do upis vaig o paip sabap do azamut. Ohodong nodii ngaavi o tuhun.

Oubat Vaig Asam
Kiguno vaig asam songian do aiso vaig. Nung koponimung vaig asam, au dii tagal momoguno vaig paip do pimpoduan toi pomupu toi pomohiung. Okudi dii pambalai do bil vaig noubatan. Songian do aiso kapanaakan do vaig sabap do noumbak o paip toi azamut o vaig, miho gunoon ii vaig lasam di notimung.

Dadi, kiguno nogi ii vaig lasam. Koontok mogium lahan monimung vaig asam montok gunoon songian aiso vaig noubatan.

Sukung Bavang Kaiduan (Kaiduan Dam)
Kivaa atag do monoodo do Sukung Bavang Kaiduan (Kaiduan Dam) montok no do gunoon do mogiigizon ngaavi ponong kotonobon kaampai no Kota Kinabalu. Kivaa timpu do mikot do au kouha ii vaig id Sukung Babagon, ka. Maan haid potoundao kapanaakan vaig montok tiinu, ka.

Tuhun mamasok ponong id sokid do Penampang au kaakun do maan tuidongo ii Sukung Kaiduan. Ovuzas kopooposizon za, ka dioho. Kivaa pipio kakampungan do otoob songian do otoodo o sukung dii kaampai no Buayan, Terian, Kionop, Kalanggaan, Kisada, Timpayasa, Longkogungan om suvai po kinoizonon. Atagak o poobuvatan do doiho. Atagak pomogunan do tuhun doiho.

Tou, ingkuo kodimpoton do ahal diti do tiinu. Nga otopot ih kozo do hobi ogumu o tuhun, hobi ogumu vaig do gunoon. Gisom songian ma do kouha toi kavangah o vaig mantad Babagon? Kivaa nangku lahan suvai kopogiuman do vaig?

Tumanud do koponoizukan, hobi-kuang do 46 piatus (46%) o vaig noubatan baino do atagak (atanggazang) do aiso gatang. Kahavas vaig sabap do noumbak paip tagazo toi paip kumaa 'metre'. Vaig dii maan panakao aiso balai om asaasau do maahavas nopo tu au ih balazan ii.

Mositi nopo do kivaa lahan monguhan toi manalasai do nuununu nopo ahal mooi do aiso di olugi' toi atagakan do ningkokoton do id kopooposizon.

Kopointahangan:
Bavang Moyog muzu pakaazan id Putatan. Bavang mantad Kaiduan humuzung kumaa Papar.